వాస్తవ నీతి-తృతీయ భాగం-క్రైస్తవం ఇంత అమానుషమా-Sam Harris

తృతీయ భాగం


వాస్తవ నీతి
బైబుల్ ను దైవ వాక్యంగా పరిగణిస్తే తప్ప విశ్వ వ్యాప్తమైన నీతిప్రమాణాలు ఉండడానికి వీలులేదంటారు. కాని నియమాలు ఇచ్చే దేవుడు లేకుండానే నిష్పాక్షికంగా నీతి విధానాలను ఆలోచించవచ్చు. బాహ్యమైన నీతి సూత్రాలు తెలుసుకోదగినవి ఉంటే ప్రపంచంలో సంతోషాన్ని పంచుకోవటానికి ఉత్తమ అధమ మార్గాలు వెలువడతాయి. మానవులను నిర్దేశించే మానసిక నియమాలు ఉంటే బాహ్య నీతికి తగిన ఆధారం కూడా లభిస్తుంది. మానవ నీతికి శాస్త్రీయ అవగాహనలో తుది అంశం అంటూ ఏదీ లేదు. చంపడం, చెరచడం, పొరుగువారిపట్ల అలాంటి ప్రవర్తన కూడదనడం సర్వ సాధారణంగా వస్తున్నదే. ప్రేమ సంతోషానికి దారితీస్తుందని ద్వేషం అలాంటి సంతోషం ఇవ్వదని స్పష్టంగా తెలుస్తున్నది. సామాజిక సంబంధాలలో బాహ్యరీతులు ఈ విధంగా కనిపిస్తూనే ఉన్నాయి. ఎలాంటి పవిత్ర గ్రంథాలు ప్రస్తావించకుండానే హిట్లర్ తప్పు చేస్తున్నాడని, నైతికంగా దోషి అని చెప్పవచ్చు.
ఇతరుల పట్ల ప్రేమ చూపటం సంతోషానికి దారితీసే అంశమైనా, మనము ప్రేమించిన వారిని పట్టించుకోవడంలో సుఖదుఃఖాలు స్పష్టంగా ఉంటాయి. సుఖాన్ని కోరుకోవడంలో త్యాగం, మనకి కావాలనుకునేవాటిని త్యజించడం కూడా కొన్నిసార్లు హేతుబద్ధంగానే కనిపిస్తుంది.  అనేక సందర్భాలలో ఇతరుల కోసం త్యాగం చేసి మన సంక్షేమాన్ని కాపాడుకోవడం కూడా గొప్ప లక్షణంగానే ఉన్నది. ఇందులో తగిన ఆధారాలు లేకుండా అనుబంధాలు పెంచుకోలేము. బైబుల్ లో జీసస్ చెప్పినదాన్ని బట్టి మానవజీవితాన్ని మార్చగలిగేది ప్రేమ. అటువంటి క్రీస్తు ప్రవచనాలను స్వీకరించడానికి అతడు కన్యకు పుట్టాడని, మరోసారి భూమి మీదకు తిరిగి వస్తాడని నమ్మనక్కరలేదు.
మతంలో దుర్మార్గపు ప్రభావం ఏమంటే వాస్తవంగా మానవులు జంతువులు బాధపడే చోట నీతికి ఎలాంటి సంబంధం అందులో లేదని చెప్పడమే. నీతితో నిమిత్తం లేనప్పుడు అది ఉన్నట్లు ఊహించడం మతం చేస్తున్న పని, బాధలు నివారించడం అనే అంశంలో నీతి వుందా లేదా అనేది మతం పట్టించుకోదు. చాలా అవినీతికరమైన విషయాలలో నీతిని ఊహించుకోమనడం మతం చేస్తున్నపని. అలాంటి సందర్భాలలో అమాయక ప్రజలు అనవసర బాధలకు గురి అవుతున్నారు. మీ వంటి క్రైస్తవులు గర్భస్రావాన్ని వ్యతిరేకించనప్పుడు ఇలాంటి ఫలితమే వస్తుంది. దీనికి బదులు సామాజిక హత్యలను వ్యతిరేకిస్తే బాగుంటుంది. మానవ పిండాలు గురించి పట్టించుకునేదానికంటే జీవకణాలపై పరిశోధన చేసి జీవితాన్ని కాపాడే రీతులు కనిపెట్టాలి అనే అంశాన్ని గుర్తుంచుకుంటే బాగుంటుంది. లక్షలాది మంది ఏటా ఎయిడ్స్ వ్యాధితో చనిపోతూ ఉంటే ఆఫ్రికాలోని సబ్ సహారా ప్రాంతంలో కండోములు వాడకూడదని ఎందుకు ప్రచారం చేస్తున్నారో అర్థం కాదు.  
మతపరంగా సెక్స్ ను నీతికి ముడిపెట్టి తప్పుగా చూడటం సాధారణంగా గమనిస్తున్నాం. ఇద్దరు స్త్రీ పురుషులు పరస్పర అంగీకారంతో లైంగిక సంబంధం పెట్టుకున్నా అది అదుపులో పెట్టాలని భావిస్తే ఏమేరకు మానవుడి బాధల్ని నివారించగలమో అర్థం కాదు. బాధల నుండి విమోచన చేయడానికి ప్రాధాన్యత ఇవ్వకపోవడం గమనార్హం. నగ్నంగా ప్రజలు చేసే పనుల పట్ల సృష్టికర్త నొచ్చుకుంటున్నట్లుగా వీళ్లు చెబుతారు. మానవుడి బాధలకు ఇది అదనంగా జతచేసే విషయం కూడా.
లైంగిక సంబంధం ద్వారా అమెరికాలో వస్తున్న ప్రమాదకరమైన రోగాలలో హ్యూమన్ పాపిలోమా వైరస్ ఉన్నది. అమెరికాలో సగం జనాభాకు ఈ వైరస్ అంటుకుంటున్నది. ఏటా ఐదువేలమంది స్త్రీలు సర్వికల్ కాన్సర్ ద్వారా చనిపోతున్నారు. ప్రపంచవ్యాప్తంగా ఈ వ్యాధివల్ల చనిపోయేవారు రెండు లక్షలకు పైగా ఉన్నారని రోగ నిరోధక కేంద్రాలు లెక్కలు చెబుతున్నాయి.  ఈ వైరస్ కు నేడు వేక్సిన్ లభిస్తున్నది. అది సమర్థవంతంగా సురక్షితంగా పనిచేస్తున్నది. చికిత్సలో ముందుగా పరీక్షచేసి చూచినప్పుడు  ఈ వాక్సిన్ ఆరువేలమంది స్త్రీలలో నూటికి నూరుశాతం రోగ నిరోధక శక్తి పెంపొందినట్లు తెలిసింది. ప్రభుత్వంలో క్రైస్తవ మితవాదులు దీనికి అడ్డుచెబుతూ పెళ్ళి కాకముందు లైంగిక సంబంధానికి ఇది తోడ్పడుతుందని అన్నారు. లైంగిక సంబంధం ఆపడానికి సర్వికల్ క్యాన్సర్ ను అట్టిపెట్టుకోవడం పవిత్రత పేరుతో చేస్తున్న పని. దానివలన వేలాది స్త్రీలు ఆహుతయిపోతున్నారు.
యువతులను లైంగిక విధానాల నుండి నిగ్రహంగా ప్రవర్తించమని చెప్పడంలో తప్పులేదు. అలా చెప్పినందువలన యువతులలో గర్భం ధరించడం, లైంగికంగా వచ్చే వ్యాధుల్ని ఆపడం కుదరలేదు.  నిగ్రహించుకోమని పిల్లలకు బోధిస్తే లైంగిక చర్యలో వారు చాలా వరకు కండోములు వాడుతున్నారు. యువతులుగా ఉన్న కన్నెలు ప్రమాణాలు చేసి సగటున 18 మాసాలపాటు లైంగిక సంబంధాన్ని నిలపగలుగుతున్నారు. ఆ సమయంలో లైంగికంగా ఇతర చర్యలకు నిమగ్నులవుతున్నారు. అమెరికా యువతీ యువకులు మిగిలిన అభివృద్ధి చెందిన ప్రపంచంలోవలె లైంగిక సంబంధాలను అట్టిపెడుతున్నారు. కానీ అమెరికాలో అమ్మాయిలు గర్భం ధరించడం, పిల్లల్ని కనడం, గర్భస్రావానికి తలపెట్టడం మిగిలిన చోట్ల కంటే నాలుగైదు రెట్లు ఎక్కువగా జరుగుతున్నది. అమెరికాలో యువతరానికి లైంగిక వ్యాధులు, హెచ్ ఐ వి రోగాలు ఉంటున్నాయి. అమెరికా యువతరంలో గనేరియా వ్యాధి, ఫ్రాన్స్, నెదర్లాండ్స్ కంటే 70 రెట్లు అధికంగా ఉంటోంది. సెక్స్ విద్యా కార్యక్రమాలు, కేవలం నిగ్రహాన్ని పాటించమంటూ సాలీనా 200 మిలియన్ డాలర్లు అలా విద్యా కార్యక్రమాలకు ఖర్చు పెడుతూ ఉండటం వలన ప్రయోజనం చేకూరడంలేదు.
మీ వంటి క్రైస్తవులు యువతరంలో వస్తున్న గర్భధారణ గురించి వ్యాధుల వ్యాప్తి గురించి  ప్రధానంగా పట్టించుకోరు. లైంగిక సంబంధాల వలన పడే బాధల్ని గమనించట్లేదు. వీరు చింతించేదల్లా లైంగిక చర్యలు గురించే. రెజినాల్డ్ ఫింగర్ అనే మత బోధకుడు ఇటీవల హెచ్.ఐ.వి. వ్యాక్సిన్ గురించి ప్రతిఘటన ఉద్యమం చేస్తానని ప్రకటించాడు. తద్వారా కోట్లాదిమంది స్త్రీ పురుషులు ఏటా ఎయిడ్స్ వ్యాధితో చనిపోవడం సంభవిస్తుంది. అయితే అతడి దృష్టిలో వ్యాక్సిన్ తీసుకుంటే పెళ్శికి ముందే లైంగిక సంబంధాలు ప్రోత్సహించినట్లవుతుందని అతని ఉద్దేశ్యం. మీ మత నమ్మకాలు ఈ విషయంలో ఘోర విపత్తులు తెచ్చిపెడుతున్నాయి. ఈ అభిప్రాయాలు వెల్లడించిన వ్యక్తి రోగ నిరోధక చర్యల సంఘం సలహాదారుగా ఉన్నాడు.
పిండం స్థాయిలో కణాల పరిశోధనపై మీ ధోరణి అసహ్యకరంగా ఉన్నది. గత శతాబ్దంలో వైద్యరంగంలో కణ పరిశోధనలు చాలా ఆశాభావాన్ని కలిగించిన విషయం, మానవులు బాధపడుతున్న అనేక జబ్బులకు విరుగుడుగా ఈ పరిశోధన తోడ్పడే అవకాశం ఉంది. పిండంలో కణాలు తొలి దశలోనే మానవ శరీరంలో టిష్యూగా మారే అవకాశం ఉందని గుర్తుంచుకోవాలి. క్యాన్సర్ ను గురించి మన అవగాహనకు, అనేక రోగాల విషయంలో విషయ పరిజ్ఞానానికి  ఈ పరిశోధనలు తోడ్పడతాయి. కనుక కణ పరిశోధన ప్రాధాన్యత ఎంత విశేషమో చెప్పనక్కరలేదు. పిండం మూడు రోజుల స్థాయిలో కణాలు అంతం కావచ్చు. అదే మిమ్మల్ని కలవర పెడుతుంది.
వివరాలు చూద్దాం. మూడు రోజుల మానవ పిండంలో 150 కణాలుంటాయి. వాటిని బ్లాస్టోసిస్ట్ అంటారు. పోల్చి చెప్పాలంటే ఒక ఈగ మెదడులో లక్ష కణాలుంటాయి. మానవుడి పిండంలో కణ పరిశోధన వలన నశించిపోతోంది అనే స్థాయిలో మెదడు లేదని గ్రహించాలి. కనీసం నరాలు కూడా ఉండవు. అందువలన అవి విధ్వంసం అవుతుంటే అక్కడ బాధపడేవాళ్లు ఎవరూ లేరు. వ్యక్తి మెదడు చనిపోయినప్పుడు ఆ వ్యక్తి సంపూర్ణ మానవుడుగా గుర్తింపబడడు. అలాగే బ్లాస్టోసిస్ట్  కూడా. బాధపడడం అనేది పట్టించుకోవలసిన విషయం అయితే మానవులలో బ్లాస్టోసిస్ట్ ను అంతం చేయడం కంటే ఈగను చంపడం నైతికంగా ఎక్కువగా బాధాకరం కావాలి.
ఈగకు మానవ బ్లాస్టోసిస్ట్ కు ప్రధానమైన తేడా ఉన్నదని, బ్లాస్టోసిస్ట్ ఉత్తరోత్తర సంపూర్ణ మానవుడయ్యే అవకాశం ఉన్నదని అనవచ్చు. జెనెటిక్ ఇంజనీరింగ్ దృష్ట్యా శరీరంలో ప్రతి కణం కూడా మానవ స్థాయి ఉన్నటువంటిదే. ముక్కు చీదినప్పుడల్లా ఎన్నో కణాలను చంపేస్తుంది. అది వాస్తవం. ఈ విధంగా చూస్తే కణాల శక్తి విషయంలో మనం ఏమాత్రం ముందుకు సాగలేం.
మానవ పిండంలో మూడురోజుల వయస్సుగల స్థాయిలో ఆత్మ ఉంటుందని అందుకని నైతికంగా పట్టించుకోవాలని అనవచ్చు. ఆ దశలో పిండాలు చీలిపోయి కవలలు అయ్యే అవకాశాలు కూడా ఉన్నాయి. అంటే ఒక ఆత్మ రెండుగా చీలిపోతుందనా. మరికొన్ని సందర్భాలలో రెండు పిండాలు కలిసిపోయి ఒక వ్యక్తిగా మారితే దానిని చిమేరా అంటున్నాం. ఆ విధంగా పెంపొందిన మానవులు ఉన్నారు. మతవాదులు ఇలాంటి సందర్భాలలో అదనపు ఆత్మ ఎలా నిర్ధారించాలో తెలియక సతమతమవుతున్నారు.
ఇలాంటి ఆత్మ లెక్కల గురించి చెప్పడం అర్థం పర్థం లేనిదని అనిపించడం లేదా, మేథస్సు దృష్ట్యా ఆత్మల భావాన్ని సమర్థించలేం. నైతికంగానూ సమర్థించలేం. వైద్య చరిత్రలో గొప్ప అవకాశాలను సాగనివ్వకుండా ఈ వాదనలు అడ్డుపడుతున్నాయి. పైగా  ఈ నమ్మకాలు  ఆత్మలపరంగా చూస్తే కోట్లాది మానవుల బాధల్ని ఇంకా పొడిగించే అవకాశం వుంది.
బ్రతుకు అంటే గర్భం ధరించినప్పుడు ఆరంభం అవుతుందని అంటారు. ప్రతి బ్లాస్టోసిస్ట్ లో ఆత్మలున్నాయని ఒక ఆత్మ మరొక ఆత్మ అవసరాలను తీర్చలేదని చెబుతారు. విశ్వాసం ఆధారంగా హేతుబద్ధం కాని విషయాలను చెబితే కణ పరిశోధన సాగదు. అలాంటి వాదనలో నైతికత లేదు. విషయం తెలియక పిండస్థ స్థాయిలో కణ పరిశోధనలు అడ్డుకుంటున్నాయి. అమెరికా ప్రభుత్వం ఈ పరిశోధనలకు ఆర్థిక సహాయాన్ని చేయకపోవడంలో నైతిక కారణాలేమీ లేవు. కణ పరిశోధనకు విపరీతంగా వనరులు సమకూర్చి తక్షణమే దానిని ముందుకు సాగనివ్వాలి. క్రైస్తవుడు ఆత్మల గురించి నమ్మినందువలన ఇలా చేయమనడం లేదు.
అనేక రాష్ట్రాలు కణ పరిశోధనను చట్ట విరుద్ధం చేశాయి. సౌత్ డకోటాలో బ్లాస్టోసిస్ట్ పై పరిశోధన చేస్తే జైలుపాలు కావచ్చు కూడా. ఇక్కడ నైతిక సత్యం స్పష్టం. బ్లాస్టోసిస్ట్ పట్ల ఆసక్తిని మతపరంగా గమనించకపోతే అటువంటి వారి నైతిక దృష్టి విఫలమైనట్లే, మతానికి, నీతికి ఉన్న సంబంధాన్ని తక్కువ ధోరణిలో చెబుతున్నారు. మత మూర్ఖవాదం నైతిక వివేచనను కప్పిపుచ్చుతున్నది.

మూలం అనువాదం
శామ్ హారిస్ ఎన్. ఇన్నయ్య


.

క్రైస్తవం ఇంత అమానుషమా? శామ్ హారిస్ Part 2

ద్వితీయ భాగం

అసత్య బోధనలు
ఈ విషయములను నీవు తప్పక బోధించుచు, హెచ్చరించవలెను.
మన ప్రభువగు ఏసుక్రీస్తు యొక్క యథార్థములగు పలుకులను, దైవభక్తికి అనుకూలమగు బోధనలను అంగీకరింపక వానికి విరుద్ధమగు సిద్ధాంతమును బోధించు ఏ వ్యక్తియైనను జ్ఞానశూన్యుడు, పొగరుబోతు. అట్టి వానికి వాగ్వివాదములయందును, వాగ్యుద్ధముల యందును అభిలాష మెండు. వీని మూలముగ అసూయలు కలహములు, దుషణలు, దుష్ట సందేహములు.’
-- తిమోతి 6..1 – 4
19వ శతాబ్దంలో బానిసత్వం పోవాలనేవారు సరిగానే ఆలోచించినప్పటికీ మత రీత్యా వారి వాదన బలహీనంగా ఉన్నది. 1845లో రిచర్డ్ ఫుల్లర్ చెప్పినట్లు బైబుల్ లోని పాత కొత్త నిబంధనలలో దేవుడు చూపిన మార్గాలు పాపాలు కావడానికి వీలులేదు. రిచర్డ్  ఈ విషయంలో గట్టి ఆధారాలతో ఉన్నారు. క్రైస్తవ మత శాస్త్రం బైబుల్ లోని లోపాలను దిద్దగలిగిన స్థితిలో లేదు.
బానిసత్వం పోవాలనేవారు బైబుల్ నుండే ప్రేరణ పొందారని అనవచ్చు. ఆ మాట నిజమే. బైబుల్ నుండి నైతిక, ప్రేరణాత్మక విషయాలను సమర్థించుకోవడానికి అక్కడక్కడ ఉదహరించిన విషయాలను చూపుతున్నారు. దీనిని బట్టి బైబుల్ ను దైవవాక్యంగా ఆమోదిస్తే కోట్లాది అమాయక స్త్రీ పురుషులను, పిల్లలను బానిసత్వం వైపు దింపడం వారి దృష్టిలో తప్పు కాదు. బైబుల్ బానిసత్వానికి మించి చేసిన సమర్థన అలాంటిది. కొంతమంది బానిసత్వం పోవాలనేవారు బైబుల్ లో కొన్ని భాగాలను ఉదహరిస్తూ మిగిలిన భాగాలు తృణీకరిస్తే బైబుల్ మంచి నీతివంతమైన మార్గదర్శి కాబోదు. మానవుడు నైతిక సమస్యలు పరిష్కరించుకోవడానికి బైబుల్ ను సంప్రదించాలనడం ఉచితం కాదు. బానిసలు కూడా మనవలె మానవులే. వారికీ సుఖదుఃఖాలు ఉంటాయని గ్రహిస్తే, పొలంలో వాడుకునే పనిముట్లువలె వారిని చూడటం మంచిది కాదు.  ఈ నిర్ణయానికి రావడం సులభమే అయినప్పటికీ అమెరికాలో పవిత్ర క్రైస్తవులుగా భావించబడుతున్న దక్షిణాది ప్రాంతపు సమాఖ్యవారు తుపాకీలు పట్టుకొని బైబుల్ వాక్యాలను ప్రచారం చేస్తున్నారు.
బైబుల్ పేర్కొన్న పది ఆజ్ఞలు గురించి ఆలోచించాలి. అమెరికాలో చాలామంది వాటిని నైతికంగా, చట్టబద్ధంగా తప్పనిసరి అంటున్నారు. అమెరికా రాజ్యాంగంలో దేవుడు ప్రస్తావన లేదు. రాజ్యాంగం ఏర్పడినప్పుడు అది మతేతర ప్రమాణ పవిత్రంగా భావించారు. కాని క్రైస్తవులు అమెరికాలో యూదు-క్రైస్తవ సూత్రాలపై స్థాపించినట్లు భావిస్తున్నారు. అందుకు మద్దతుగా పది ఆజ్ఞలను చూపుతున్నారు. వాటికి అమెరికా చరిత్రకు పొందిక ఏమిటని పరిశీలించవచ్చు. పది ఆజ్ఞల పట్ల మన గౌరవం యాదృచ్ఛికమైనది కాదని భావించాలి. బైబులులో పది ఆజ్ఞలను సృష్టికర్త స్వయంగా రాసినందున అవి ప్రాధాన్యతను సంతరించుకున్నాయన్నారు. అలాంటి వాక్యాలు తిరుగులేనివని ఏ భాషలోనైనా ఏ విషయంలోనైనా వాటికి సాటి లేదని అంటున్నారు. అవేమిటంటే –
  1. మేము తప్ప మరొక దేవుడు లేడు.
  2. దేవుడి పేరిట రూపాలు చిత్రించరాదు.
  3. దేవుని పేరును దుర్వినియోగ పరచరాదు.
  4. విశ్రాంతి రోజున పవిత్రంగా గడపడం అవసరం.
  5. తల్లిదండ్రులను గౌరవించాలి.
  6. హత్య చేయరాదు.
  7. దొంగతనము చేయరాదు.
  8. వ్యభిచరించరాదు.
  9. పొరుగువారికి వ్యతిరేకంగా దొంగ సాక్ష్యం చెప్పరాదు.
  10. పొరుగువాని ఇంటిని, అతని భార్యను, అతని సేవకులను, అతని పశువులను ఆశించకూడదు.
ఇందులో మొదటి నాలుగు ఆజ్ఞలు నీతికి సంబంధించినవి కావు. యూదులకు, క్రైస్తవులకు సంబంధం లేనివి. హిందుమతం, తదితర మతాల కళలు స్వీకరించి పాటించరాదు. ‘దేవుడు శపించు’గాక అనే మాటలు వాడరాదు. సాబత్ వంటి విశ్రాంతి రోజున పనిచేస్తే మరణ శిక్షకు పాత్రులవుతారు. నాగరికత నిలబెట్టుకోవడానికి ఈ ఆజ్ఞలు ఎంత ప్రాముఖ్యత చెందినవో గమనించండి.
5 నుండి 9 ఆజ్ఞల వరకు నీతికి సంబంధించినవి ఉన్నాయి. ఎంతమంది తమ తల్లిదండ్రులను గౌరవించారో, హత్యలు, వ్యభిచారం, దొంగతనం చేయకుండా ఉన్నారు అనేది ప్రశ్నించదగిన అంశం. చరిత్రలో ఇలాంటి వాటిని అన్ని సమాజ సంస్కృతులు ఖండించాయి. బైబిల్ లో వాటి ప్రస్తావనకు ప్రత్యేకత ఏమీ లేదు. తల్లిదండ్రులను బాగా చూడడం అనేది జీవ సంబంధమైన కారణాలుగా పరిణమించింది. హత్య చేసిన వారిని, వ్యభిచారులను, దొంగలను, అబద్ధాలాడేవారిని ఈసడించుకోవడం సర్వసాధారణం. పవిత్ర గ్రంథాలు రాకముందు నుండి క్రూరత్వాన్ని ఈసడించడం న్యాయబద్ధంగా ఉండాలనడం, నైతిక ఉద్వేగ రీతులుగా వచ్చాయి. మానవులకు ముందు నుండి ఇలాంటి ఉద్వేగాలు ఉన్నట్లు అధ్యయనాలు తెలుపుతున్నాయి. ఆదిమ మానవులు కూడా పూర్వం తమ సన్నిహితులకు ఆదరణ చూపుతూ హత్యల్ని, దొంగతనాల్ని సహించకుండా గడిపిన సందర్భాలున్నాయి. మోసాన్ని, లైంగిక ద్రోహాన్ని కూడా ఇష్టపడని రీతులున్నాయి. చింపాంజీలలో ఎన్నో క్లిష్టమయిన సామాజిక రీతులున్నాయి. మన బంధువులలో ఎలాంటి ప్రవర్తన కావాలనుకుంటామో అటువంటివి చింపాజీలలో కనిపిస్తాయి. కనుక నీతి సూత్రాలు పాలరాతిపైన చెక్కి చూపినంత మాత్రాన అవన్నీ పవిత్ర గ్రంథాల నుండి వచ్చినట్లు కాదు. ఈ విషయం అమెరికా వారు గ్రహించాలి. సృష్టికర్త పశువులను, సేవకులను పట్టించుకోకుండా పవిత్రగ్రంథాలు ప్రవచించాడనుకుందామా?
బైబుల్ దేవుణ్ణి వాస్తవంగా స్వీకరిస్తే అతడు చెప్పిన ఆజ్ఞలు అనుసరించడానికి అశ్రద్ధ చేయడానికి మానవులకు స్వేచ్ఛ లేదు. శిక్షలు వేసే విషయంలోనూ చూసీ చూడనట్లుగా పోవడం కూడా దేవుడు ఒప్పుకోడు. పది ఆజ్ఞలను ఉల్లంఘిస్తే శిక్షలు తప్పనిసరి అన్నాడు.
పది ఆజ్ఞల నుంచి నీతి విషయంలో మెరుగైనవి మరేవీ లేవనుకుంటే ఇతర పవిత్ర గ్రంథాలలో అలాంటివి ఎన్నో ఉన్నాయి. జైనులలో వీటిని చూడవచ్చు. బైబుల్ వీటిని మించిపోయిన సూత్రాలను జైన మహావీరుడు చెప్పాడు. ‘హాని చేయవద్దు, దూషించవద్దు, అణచివేయవద్దు, అవమానించవద్దు, చిత్రహింసలు పెట్టవద్దు. బానిసలుగా బంధించవద్దు. జీవులను చంపవద్దు.’ బైబిలులో ఈ సూత్రం ఉంటే ప్రపంచం మరో తీరుగా ఉండేదేమో. శతాబ్దాలుగా దేవుళ్ళ పేరుతో క్రైస్తవులు అణచివేశారు. బానిసలను చేశారు, అవమానించారు. చిత్రహింసలు చేశారు. చంపారు. ఇదంతా బైబుల్ చదివి తదనుగుణంగా మతాన్ని కాపాడుతున్నామనుకుని చేసిన పనే. జైన సూత్రాలను పాటిస్తే ఇలాంటివి చేయడం అసంభవం. అటువంటప్పుడు నీతిని గురించి ఎవరూ చెప్పనంతగా బైబుల్ స్పష్టంగా చెప్పిందని ఎవరం అనగలం?  

మూలం అనువాదం
శామ్ హారిస్ ఎన్. ఇన్నయ్య





.

క్రైస్తవం ఇంత అమానుషమా?శామ్ హారిస్--Part 1

అమెరికాలో క్రైస్తవులనుద్దేశించి శామ్ హారిస్ (సుప్రసిద్ధ మనోవిశ్లేషణ శాస్త్రజ్ఞుడు, హేతువాది) ‘ఒక బహిరంగ లేఖ’ను సంచలనాత్మకంగా ప్రచురించాడు. లోగడ ‘మూఢనమ్మకాలకు స్వస్తి’ అనే గ్రంథం రాసి బహుళ ప్రచారం పొందిన శామ్ హారిస్ లేఖతో మరికొంత సంచలనం సృష్టించాడు. ఆయన అనుమతితో దీన్ని తెనిగించి ప్రచురించాను. అది వరుసగా ఇక్కడ అందిస్తున్నాము.

క్రైస్తవం ఇంత అమానుషమా
(లెటర్ టు క్రిస్టియన్ నేషన్)
పరిచయ వాక్యాలు
శామ్ హారిస్ మాటలలో సౌమ్యుడు. కలం పడితే చాలా పదునైన భావాలు వెలువడతాయి. మతాల ఘోర కృత్యాలను, దారుణ హింసలకు బాగా రియాక్ట్ అయ్యి మానవులను మంచి మార్గంలో నడపడానికి మతాలు ఎలా అడ్డు వస్తున్నాయో అధ్యయనం చేసి తెలుసుకున్నారు. ఆయనను మొట్టమొదట 2005లో అమెరికాలో బఫెలో నగరంలో కలిశాను. సెంటర్ ఫర్ ఇంక్వరీ ట్రాన్స్ నేషనల్ వాళ్ళు పాల్ కట్జ్ ఆధ్వర్యాన నూతన వికాసం అనే పేరిట 5 రోజులపాటు ప్రపంచ సభలు జరిపారు. వాటిల్లో పాల్గొనడానికి వెళ్ళినప్పుడు శామ్ హారిస్ కలిశారు. అప్పటికే ఆయన ది ఎండ్ ఆఫ్ ఫెయిత్ పుస్తకం వెలువరించారు. అది న్యూయార్క్ టైమ్స్ బెస్ట్ సెల్లర్ గా బహుళ ప్రచారంలోకి వచ్చింది. తన ఆటోగ్రాఫ్ తో ఆ పుస్తకాన్ని నాకు బహూకరించారు. వివిధ మతాల ఆచారాల, నమ్మకాల విషయాలను తెలుసుకోవడానికి పర్యటన చేస్తూ, భారతదేశంలో ఉత్తరాది ప్రాంతాలలో అనేకచోట్లకు వెళ్లానని చెప్పారు. ఆ సమావేశాల్లో చర్చా వేదిక నుండి మాట్లాడిన శామ్ హారిస్ ఎంతో నెమ్మదిగా ప్రశాంతంగా మాట్లాడారు.
శామ్ హారిస్ 1967లో పుట్టారు. ఆయన స్టాన్ ఫర్డ్ యూనివర్సిటీలో ఫిలాసఫీ చదివారు. సుప్రసిద్ధమైన పత్రికలకు వ్యాసాలు రాశాడు. అందులో లాస్ ఏంజిల్స్ టైమ్స్, ప్లే బోయ్, ఫ్రీ ఇంక్వరీ, టైమ్స్ వంటి పత్రికలలో చాలా లోతుపాతులయిన విషయాలు చర్చించారు. ఫ్లెమింగ్ ది గాడ్ హువజ్ నాట్ దేర్ అనే సినిమాలో ప్రత్యేక అభిప్రాయాలను ఇస్తూ రికార్డు చేశారు. మెదడులో నమ్మకాలకు అతీంద్రియ విషయాలకు ఆసక్తి కనబరిచే ఆధారాలు ఏమైనా ఉన్నాయా అని న్యూరో సైన్స్ విభాగంలో పిహెచ్.డి చేస్తున్నారు. దీనికిగాను ఎమ్.ఆర్.ఐ పరికరాలను ఉపయోగిస్తున్నారు. అనేక సెక్యులర్ ప్రాజెక్టులను ప్రపంచ వ్యాప్తంగా స్థాపించి హేతుబద్ధంగా శాస్త్రీయంగా ఆలోచించడానికి పథకాలు వేశాడు. హఫింగ్టన్ పోస్ట్ వ్యాసాలు బహుళ ప్రచారంలోకి వచ్చాయి. తూర్పు పశ్చిమ ప్రపంచపు సంప్రదాయాలను ప్రత్యేకంగా అధ్యయనం చేస్తున్నారు. అమెరికా యూరోపులలో నిరంతర చర్చా వేదికలలో పాల్గొంటున్నారు.
శామ్ హారిస్ క్రైస్తవుల ప్రాబల్యాన్ని, అమెరికాలో వారి మూర్ఖత్వాన్ని మతం పేరిట అటు అధికారంలో ఉన్నవారు. ఇటు చర్చిల పురోహిత వర్గాలు చేస్తున్న మావో చిత్రహింసలను బయట పెడుతున్నారు. ప్రత్యేకంగా వెబ్ సైట్ కూడా నడుపుతూ ఆసక్తిపరులకు జిజ్ఞాసాపూర్వకమైన విషయాలను అందిస్తున్నారు. క్రైస్తవులపై ఆయన చేసిన దాడి ఇతర మతాలకు కూడా వర్తిస్తుంది. ముస్లింలు, హిందువులు, యూదులు, సిక్కులు తదితరులు చేస్తున్న దారుణాలను ద ఎండ్ ఆఫ్ ఫెయిత్ లో బాగా విపులీకరించారు. సమకాలీన ప్రపంచంలో బుష్ ఆధ్వర్యాన ఛాందస క్రైస్తవుల విజృంభణతో సమాజం ఎలా వెనక్కు పోతున్నదో హెచ్చరించడానికి రాసిన  ఈ పుస్తకం చాలా శక్తివంతమైన ఆయుధం.
ఫ్రీ ఇంక్వరీ పత్రిక ఎడిటర్ నా మిత్రులు టాం ఫ్లిన్ ఈ రచన తెలుగు అనువాదానికి చొరవ తీసుకుని అనుమతి పంపేటట్లు ఏర్పాడు చేశారు. ఆయనకు ధన్యవాదాలు. ఇటువంటి ఆలోచన భారతదేశంలోనూ అవసరమేనని మిత్రులు శిశిర్ చలసాని  ఈ గ్రంథాన్ని తెనిగించమని విస్తారంగా ప్రజలలోకి వెళ్ళాలని ప్రోత్సహించారు. ఆయన కనబరిచిన ఉత్సాహమే  ఈ అనువాదానికి ప్రచురణకు దారితీసింది.
శక్తివంతమైన ఇటువంటి శాస్త్రీయ దృక్పథాలు అన్ని మతాలకు అన్వయిస్తూ రావాలి. పాఠకులు ఈ గ్రంథాన్ని చదివి, చదివించి సమాజానికి ఉపయోగపడతారని ఆశిస్తున్నాను. శామ్ హారిస్ ప్రస్తుతం న్యూయార్క్ లో ఉన్నారు. ఆయనకు భార్య కుమారుడు ఉన్నారు.

--- ఎన్. ఇన్నయ్య











పాఠకులకోమాట
నమ్మకానికి అంతం (ఎండ్ ఆఫ్ ఫెయిత్) అనే శీర్షికన నా తొలి పుస్తకం రచించినప్పటి నుండి దేవుణ్ణి నమ్మకపోవడంలో నేను తప్పు చేస్తున్నానని వేలాదిమంది నాకు ఉత్తరాలు రాశారు. ఇందులో క్రైస్తవుల నుండి వ్యతిరేకమైనవి వచ్చాయి. ఇది చాలా విడ్డూరమైనది. ఇతరులకంటే తమ మతం ప్రేమను, క్షమాపణను చాలా బాగా ఆచరణలోకి పెడుతుందని ఊహిస్తారు. క్రీస్తు ప్రేమ వలన మారిపోయామని చెప్పేవారు. విమర్శలు సహించలేక చాలా ఘాటుగా హత్యచేసేటంత కసిగా ఉంటున్నారు. ఇది మానవ స్వభావం అనుకోవచ్చు. కానీ అలాంటి ద్వేషం బైబిల్ నుండి రాబట్టడం స్పష్టంగా ఉంది. ఇదెలా తెలుసు? నాకు ఉత్తరాలు రాసేవారు బైబిల్ లో అనేక సూత్రాలను ఉదహరిస్తూ ఉంటారు.
ఈ పుస్తకం అన్ని మతాల వారిని ఉద్దేశించి ఉంది. కాని క్రైస్తవులకు బహిరంగ లేఖగా దీనిని బయట పెడుతున్నాను. క్రైస్తవులు తమ మత విశ్వాసాలను సమర్ధిస్తూ వాదించే తీరును దృష్టిలో పెట్టుకుని రాశాను. మన సమాజంలో సెక్యులరిస్టులు మతాన్ని ప్రభుత్వాలకు దూరంగా ఉంచాలని కోరుతున్నారు. వారిని సమర్థిస్తూ ఈ రచన చేశాను. క్రైస్తవులు ఇందుకు వ్యతిరేకంగా తమ హక్కులకు పోరాడుతున్నారు. ఈ పుస్తకంలో క్రైస్తవం అని ఉద్దేశించింది పరిమిత దృక్కోణంలోనే. క్రైస్తవులు బైబిల్ ను దైవ ప్రేరణ విధంగా భావిస్తారు. జీసస్ క్రైస్ట్ కు దివ్యత్వం ఉన్నట్లుగా నమ్మినవారే మరణానంతరం ముక్తిని పొందుతారని అంటారు. అమెరికా జనాభాలో చేసిన వైజ్ఞానిక సర్వేలను బట్టి సగంమంది ఇలాంటి నమ్మకాలు వెల్లడిస్తున్నారు. క్రైస్తవ శాఖలో  ఈ నమ్మకాలు వివిధ రీతులుగా వున్నాయి. కాథలిక్కులు, ప్రొటస్టెంట్ లు, ఎవాంజలిస్టులు, బాప్టిస్టులు, పెంటెకోస్టులు, జెహోవా విట్ నెస్ లు తదితర మితవాద శాఖలు  ఈ వాదనలో ఉన్నారు. మితవాద క్రైస్తవులు జాతీయ రంగంలో – కోర్టులలోను, స్కూళ్లలోనూ, ప్రభుత్వ శాఖలలోనూ చాలా ప్రభావాన్ని చూపుతున్నారు.
క్రైస్తవ దేశానికి బహిరంగ ఉత్తరం రాయడంలో క్రైస్తవులు నైతిక నటనలకు వారు కట్టుబడి ఉన్నామనుకునే తీరు తెన్నులు పటాపంచలు చేయదలచాను. ఉదారవాద, మితవాద క్రైస్తవులు నేను చెప్పే క్రైస్తవంలోకి రామని అంటారు. ఈ మితవాద, ఉదారవాద క్రైస్తవులు నా వలె ఇతర క్రైస్తవులు తమ హక్కుగా నిర్ధారించే విషయాలపట్ల కలవరం చెందుతున్నారు. తమ మత విశ్వాసాల పట్ల వారు కోరే హక్కులు ఆధారంగా ఇతర మతాల తీవ్రవాదులు కూడా రక్షణ కోరుతున్నారని వారు గుర్తించాలి.  ఈ ఉదార మితవాదులు విమానాలతో భవనాలను కూలగొట్టకపోవచ్చు. ప్రపంచం అంతం అవుతున్నదని చెప్పే జోస్యాలు నమ్మకపోవచ్చు. కాని పిల్లల్ని క్రైస్తవులుగా, ముస్లింలుగా, యూదులుగా పెంచడాన్ని వారు ప్రశ్నించరు. ప్రపంచంలో మతపరంగా ఉన్న అత్యంత అభ్యుదయకర నమ్మకస్తులు సైతం ప్రశ్నించడంలేదు. లెటర్ టు ఎ క్రిస్టియన్ నేషన్లో క్రైస్తవులు ఎలా విభజిస్తున్నారో, హాని చేస్తున్నారో తిరోగమనం వైపు తీసుకెడుతున్నారో చూపాను. ఇందులో ఉదార వాదులు, మితవాదులు, నమ్మకం లేనివారు సర్వసాధారణమైన విషయాలను తమ మధ్య ఉన్నాయని గ్రహించవచ్చు.
అమెరికాలో ఇటీవల గాలప్ పోల్ తీసుకుంటే కేవలం 12 శాతం మాత్రమే భూమి మీద మానవ జీవనం దేవునితో నిమిత్తం లేకుండా సహజంగా పరిణమించిందని అన్నారు. కాని 31 శాతం మంది   పరిణామానికి దేవుడు దయ ఉన్నది అన్నారు. ప్రపంచాన్ని గురించి ఎలాంటి అభిప్రాయం ఉన్నది అని పోల్ పెడితే తెలివిగల పథకం ఎవరో రూపొందించారనే అంశం తెలుస్తుంది. దేవుడు విధానం ఓడిపోతుంది. ప్రకృతిలో తెలివిగల పథకం ఎవరో రూపొందించారనే అంశానికి సాక్ష్యాధారాలు లేవు. పైగా  ఈ పథకంలో తెలివిలేని రీతులు ఎన్నో కనిపిస్తాయి. తెలివిగల పథకంపై జరుగుతున్న వాదోపవాదాలు మనల్ని పక్కదారి పట్టించరాదు. 21వ శతాబ్దంలో మతపరంగా వస్తున్న ఆందోళనకర అంశాలు విస్మరించరాదు. అమెరికాలో 53 శాతం సృష్టివాదులని గ్యాలప్ పోల్ చెబుతున్నది. ఒక శతాబ్దం పాటు శాస్త్రీయ పరిశోధన జీవితాన్ని, భూమిని గురించి ఎంతో పరిశోధనలు చేసి శాస్త్రీయంగా విషయాలు వెల్లడించింది. అయినా మన తోటి వాళ్ళలో సగం మంది 6,000 సంవత్సరాల క్రితం ఈ విశ్వం పుట్టినట్లు నమ్ముతున్నారు. సుమేరియన్లు జిగురు కనుగొన్న వెయ్యి సంవత్సరాల తరువాత పరిస్థితి ఇలా ఉన్నది. రాష్ట్రపతిని, శాసన సభ్యులను ఎన్నుకొనే అధికారం గలవారు, ఆ సభలకు ఎన్నికయినవారు నోవా ఓడలో డైనోసార్లు జంటలుగా వుండేవని, సుదూరాన ఉన్న పాలపుంతల వెలుగు భూమి ద్వారా సృష్టి అయిందని, మనుషుల్లో తొలి స్త్రీ పురుషులు మట్టి నుండి సృష్టి కాగా దైవము ఊపిరి పోసిందని, ఈడెన్ తోటలో మాట్లాడే పాము ఉండగా అదృశ్య దేవుడు ఈ చర్యలని చేశాడని నమ్ముతున్నారు.
అభివృద్ధి చెందిన దేశాలలో అమెరికా నమ్మకాలు ఏకాకిగా కనిపిస్తున్నాయి. చరిత్రలో మునుపు ఎన్నడూ లేనంతగా అమెరికా దిగజారిపోయి నిలిచింది. అగ్రరాజ్యం, ఉన్నత మూర్ఖత్వంతో ఉంటే అది దారుణమైన అంశమని నాగరికతను పట్టించుకోనివారు ఎవరైనా అనుకోవాల్సిందే.
చాలామంది నాగరికత ఎట్లాపోతే ఏంటి అనుకుంటున్నారు. అమెరికా జనాభాలో 44 శాతం జీసస్ తిరిగి వస్తాడని, రానున్న ఏభయి సంవత్సరాలలో జనాల భవిష్యత్తు నిర్ణయిస్తాడని, భూమి మీద పరిస్థితులు దారుణంగా పరిణమించినప్పుడు జీసస్ తిరిగి వస్తాడని బైబిల్ జోస్యాన్ని వ్యాఖ్యానించేవారు ఉంటున్నారు. న్యూయార్క్ నగరం అగ్నికి ఆహుతి అయితే అప్పుడు అమెరికా జనాభాలో కొందరు క్రీస్తు తిరిగి రావడానికి అదొక చిహ్నంగా భావించి ఆహ్వానిస్తారు కూడా. ఇలాంటి నమ్మకాలు మనుషుల మనసుల్ని మూసిపెడుతుంటే, సాంఘికంగా, ఆర్థికంగా, పరిసరాల దృష్ట్యా భౌగోళిక రాజకీయాల దృష్ట్యా మంచి భవిష్యత్తు నిర్మించుకోవడం కష్టం. అమెరికా ప్రభుత్వంలో చాలామంది ప్రపంచం అంతం అవుతుందని అది దివ్యమైన స్థితి అని నమ్మితే ఫలితాలు ఎలా ఉంటాయో ఊహించండి. అమెరికా జనాభాలో సగం మందికి ఇలాంటి నమ్మకాలున్నాయి. అందుకు మతంపట్ల మూర్ఖ నమ్మకమే కారణం. అటువంటి స్థితిని నైతికంగా, మేథస్సు రీత్యా అత్యవసర పరిస్థితిగా మనం భావించాలి. అటువంటి అత్యవసర పరిస్థితి ఏర్పడింది కనుకనే ఈ పుస్తకం మీ ఎదుట ఉంచాను. ఇది మీకు ఉపయోగపడుతుందని నా ఉద్దేశ్యం.
-- శామ్ హారిస్  



క్రైస్తవుల నుద్దేశించి శామ్ హారిస్ రాసిన లేఖ

బైబుల్ దైవవాణిగా మీరు నమ్ముతున్నారు. జీసస్ ను దేవుని కుమారుడుగా విశ్వసిస్తున్నారు. జీసస్ లో నమ్మకం ఉంచిన వారికే మరణానంతరం ముక్తి ఉందంటున్నారు. క్రైస్తవుడుగా ఇవన్నీ నిజమని నమ్ముతున్నారు. అంతేగాని మీకు  వాటివల్ల బాగా ఉందని అనిపించడం ప్రధానం కాదు.  ఈ నమ్మకం వలన వచ్చే సమస్యలు చూపే ముందు మీరు, నేను అంగీకరించే విషయాలు కొన్ని ఉన్నాయి. మనలో ఎవరో ఒకరు చెప్పింది సరయినది కావాలి. మరొకరిది తప్పు కావాలి. ఇక్కడ బైబుల్ దైవవాక్యం కావాలి. లేదా దైవ వాక్యం కాదు అనేది సరయిన నిర్ణయం కావాలి. మానవుడికి జీసస్ ఒకే ఒక సరయిన ముక్తి మార్గాన్ని చూపారు. (యోహాను 14:6) లేదా అతడు చెప్పినది సరయిన మార్గం కాదనుకోవాలి. సరయిన క్రైస్తవుడు మిగిలిన అన్ని మత విశ్వాసాలలో తప్పు అనుకోవాలి. వారి దృష్ట్యా అది మంచిదే. క్రైస్తవం మనకి సరయినదయితే నావంటి నమ్మకం లేనివారు నరకంలో యమ యాతనలు పడటానికి సంసిద్ధులు కావాలి. నేను నా సన్నిహితులకు నచ్చచెప్పి దైవ భావాన్ని తృణీకరించమంటాను. అలాంటి వారంతా శాశ్వత నరకంలో కాలుతూ ఉండాల్సిందే (మత్తయి 25:41). క్రైస్తవ మూల సిద్ధాంతం సరయినదయితే నా జీవితాన్ని పరమ ఛండాలంగా గడిపానన్నమాట. అరమరికలు లేకుండా ఇందుకు నేనంగీకరించాలి. క్రైస్తవాన్ని బహిరంగంగా నిరంతరం నిరాకరించిన నాకు ఎలాంటి చీకు చింతా లేవు. క్రైస్తవునిగా ఉండడానికి నీకెలాంటి అసంబద్ధమైన నమ్మకాలున్నాయో నాకు తెలుసు.
కొందరు క్రైస్తవులు ఈ రెండు వాదనలతో అంగీకరించరు. ఇతర మత విశ్వాసాలు ముక్తికి తోడ్పడతాయని నమ్మే క్రైస్తవులున్నారు. నరకం అంటే భయపడనివారు, జీసస్ తిరిగి వస్తాడని నమ్మనివారు కొందరు క్రైస్తవులలో ఉన్నారు. అలాంటివారు మతపరంగా ఉదారవాదులు, మితవాదులు అని చెప్పుకుంటారు. నాకు, మీకు విశ్వాసం రావాలంటే వారి దృష్టిలో ఏదో తప్పుగా అర్థం చేసుకుంటాం అన్నమాట. ఆలోచనాపరమైన క్రైస్తవులు ఎందరో  నాస్తిక వాదానికి, మత మౌఢ్యానికి మధ్య ఎంతో విశాలమైన, రమణీయమైన దృక్పథాలు ఉన్నాయని చెబుతూ వచ్చారని అంటున్నాం. వారి ప్రకారం విశ్వాసం అంటే మార్మికత, విడమర్చి చెప్పడం. ప్రజల నమ్మకాల నుండి కాక వారి జీవితాల పడుగు పేకల నుండి మతాన్ని రూపొందించుకుంటారన్నారు. మతపరమై ఉదారత్వం, మితవాదాన్ని గురించి వచ్చే సమస్యల్ని నేను వేరే చోట్ల ప్రస్తావించాను. ఇక్కడ వారనుకునే వాటికంటే సాధారణమైన, అత్యవసరమైన విషయాలను పరిశీలించాలి. బైబుల్ కేవలం మామూలు గ్రంథం, మామూలు మనుషులు రాసింది అయివుండాలి. లేదా అందుకు భిన్నమైనదైనా అయివుండాలి. క్రీస్తు దివ్య వ్యక్తి అయి ఉండాలి. లేదా కాదనుకోవాలి. బైబుల్ గనక మామూలు గ్రంథం అయితే, క్రీస్తు మామూలు మనిషి అయితే క్రైస్తవ మూల సిద్ధాంతం తప్పు. అలాంటప్పుడు క్రైస్తవ మత శాస్త్ర చరిత్ర సామూహిక భ్రమలతో కూడిన కథలని అనుకోవాలి. క్రైస్తవ మూల సూత్రాలు సరయినవి అనుకుంటే, నమ్మకాలు లేనివారు ఆశ్చర్యపడాల్సిన అంశాలున్నాయి. అది మీరు గ్రహించవలసి వుంది. అమెరికాలో సగం జనాభాకు ఈ విషయం తెలుసు. అందువలన చిత్త శుద్ధిగా మాట్లాడుకుందాం. ఈ వాదోపవాదాల్లో ఒక పక్షం నెగ్గుతుంది. మరో పక్షం ఓడిపోతుంది.
గమనించండి
ప్రతి ముస్లిం భక్తులు ముస్లింగా ఉండడానికి చెప్పే కారణాలు, క్రైస్తవుడు క్రైస్తవుడుగా ఉండడానికి చెప్పేకారణాలు ఒకలాంటివే అయినా ముస్లింలు చెప్పే కారణాలను సరయినవిగా నేను భావించను. కొరాన్ సృష్టికర్త వెల్లడించిన దివ్య వాక్కు అన్నారు. బైబుల్ గురించి మీరెలా నమ్ముతున్నారో, ముస్లింలు కురాన్ గురించి అలాగే నమ్ముతున్నారు. మహమ్మద్ జీవితాన్ని చిత్రిస్తూ చాలా సాహిత్యం వచ్చింది. ఇస్లాం దృష్ట్యా అతడు దైవ ప్రవక్తగా ఇటీవల ఆవిర్భవించినవాడు. మహ్మదు స్పష్టంగా చెబుతూ జీసస్ ను దివ్యత్వం కలవాడు కాదన్నాడు (కురాన్ 5:71-75; 19:30-38). అన్యథా నమ్మేవారు శాశ్వతంగా నరకంలో మగ్గుతారన్నారు.  ఈ విషయంలో మహమ్మద్ అభిప్రాయం తిరుగులేనిదని ముస్లింల ఉద్దేశ్యం.
ఇస్లాంలోకి మారడంలో మీరు కలవరపడాల్సిన అంశం ఏది? అల్లా నిజమైన దేవుడు కాదా? కొండ గుహలలో గాబ్రియెల్ అనే దేవత మహమ్మదును కలుసుకోలేదని రుజువు పరచగలవా? లేదు. ముస్లింల నమ్మకాలు అర్థం లేనివని తృణీకరించడానికి ఇవేమి రుజువు చేయనక్కరలేదు. మహమ్మదు వారి దేవుడు నిజమని నిరూపించే భారం ముస్లింలపైన పడింది. కాని వారలా రుజువు చేయలేరు కూడా. వాస్తవాన్ని గురించి సాక్ష్యాధారాలు ఉండాలని ముస్లింలు జడవలేదు. ఇస్లాం పిడివాదం మత్తులో ఉన్నవారు తప్ప మిగిలిన వారికి  ఈ విషయం అర్థం అవుతుంది.
ముస్లింలకు సంబంధించిన నమ్మకాలు ఎలాంటివో నాస్తికుడిగా ఉండటం కూడా అలాంటిదే. ముస్లింలు వారిని వారు మోసం చేసుకోవడం లేదా? కురాన్ సృష్టికర్త సంపూర్ణ వాక్కుగా భావిస్తే ఆ పుస్తకాన్ని వారు నిశితంగా చదవలేదని తెలియడంలేదా? విశ్వం సిద్ధాంతాలు చిత్తశుద్ధితో పరిశీలించడానికి పనికిరావని స్పష్టం కావడంలేదా? అవును స్పష్టమే. నీవు ముస్లిం గురించి ఎలా అనుకుంటున్నావో నిన్ను గురించి ముస్లిం భక్తులు కూడా అలాగే అనుకుంటున్నారు. అన్ని మతాల గురించి నా ధోరణి అదే.

ప్రథమ భాగం

బైబుల్ ఎంత అత్యుత్తమమైనది ?
మానవ మంచితనానికి తిరుగులేని ఆధారం క్రైస్తవమేనని నీవనుకుంటున్నావు. జీసస్ ప్రేమను, దయను, స్వార్థ రాహిత్యాన్ని చూపాడని నమ్ముతున్నావు. ఇంతవరకు వచ్చిన గ్రంథాలలో బైబుల్ అత్యుత్తమమైనదని, కాల పరీక్షకు నిలచిందని, అది దైవ ప్రేరితమని నమ్ముతున్నావు. ఈ నమ్మకాలన్నీ తప్పుడువే.
నీతికి సంబంధించిన అంశాలు ఆనందానికి, బాధలకు చెందినవే. అందుకనే మనకు శిలల పట్ల నైతిక బాధ్యత లేదు. పరోక్షంగానో ప్రత్యక్షంగానో ఇతరులకు నీతి అంశాలు అన్వయిస్తే మన చర్యల ద్వారా ప్రభావితం అయితే అప్పుడు నీతి సమస్య వస్తుంది. బైబుల్ నీతికి సంపూర్ణ మార్గదర్శకమని అనడం దిగ్భ్రమ కలిగిస్తుంది. ఆ పుస్తకంలో అంశాలు చదివిన తరువాత అలా అనిపిస్తుంది. తల్లిదండ్రులకు దేవుడిచ్చిన సలహాలు సూటిగా ఉన్నాయి : పిల్లలు దారి తప్పితే బడిత పూజ చేయండి. (సామెతలు 13:24, 20:30, 23:13-14). సిగ్గు ఒగ్గు లేకుండా మాట్లాడితే చంపేయండి. (నిర్గమకాండం 21:15, లెవీయ కాండం 20:9, ద్వితీయోపదేశం కాండం 21.:18-21, మార్క్ 7:9-13, మాథ్యూ 15:4-7) నమ్మనందుకు, వ్యభిచారానికి, స్వలింగ సంపర్కానికి, విశ్రాంతి రోజున పనిచేసినందుకు, విగ్రహారాధన చేసినందుకు, భూతవైద్యానికి తదితర ఊహాజనిత నేరాలకు రాళ్ళేసి కొట్టి చంపాలి. దేవుడికి కాలాతీత వివేచన ఎంత ఉందో ఒక ఉదాహరణ చూడండి.
నీ సోదరుడు, నీ కుమారుడు, నీ కుమార్తె, నీ భార్య, నీ స్నేహితుడు రహస్యంగా వచ్చి ఇతర దేవుళ్ళను ఆరాధించడానికి రమ్మంటే లొంగిపోవద్దు, వినద్దు, వారిపట్ల దయ చూపవద్దు, వదిలిపెట్టద్దు. దాచిపెట్టద్దు:వారిని చంపేయండి, అలాంటి వారిని హతమార్చండి, రాళ్ళతో కొట్టి చంపండి, నీ దేవుని నుండి నిన్ను తప్పించడానికి వారు ప్రయత్నం చేశారు. దేవుడిచ్చిన భూమి నుండి వైదొలగమని, ఇతర దేవుళ్ళ దగ్గరకు పోదామని ఎవరైనా పురికొల్పితే వారిని కత్తికి బలి చేయండి. వారి పశువులను కూడా చంపేయండి.
  • ద్వితీయోపదేశ కాండం 13:6, 8-17
చాలామంది క్రైస్తవులు జీసస్ గురించి నమ్ముతూ అతడు క్రూరత్వాన్నుండి వైదొలగి ప్రేమ, సహనం బోధించాడని నమ్ముతారు. కాని జీసస్ అలా చేయలేదు. నూతన ప్రకరణలో జీసస్ పూర్వ నిబంధన నియమాలను యథాతథంగా ఆమోదించాడు.
‘పరలోకము గతించినను ధర్మశాస్త్రములోని ఒక అల్పాక్షరమైనను, ఒక పొల్లు అయినను వ్యర్థముగాక అంతయు నెరవేరునని నొక్కి వక్కాణించు చున్నాను.’
కాబట్టి ఎవడు ఈ ఆజ్ఞలలో ఏ అత్యల్పమైన దానినైనను భంగపరచి, అట్లు జనులకు బోధించునో అట్టివాడు పరలోక రాజ్యమున అత్యల్పుడుగా పరిగణింపబడును. ఎవడు ఈ ధర్మశాసనమును ఆచరించి, అట్లు జనులకు బోధించునో అట్టివాడు పరలోక రాజ్యమున అత్యధికుడుగా పరిగణింపబడును.
మాథ్యూ 5:18-19
దేవదూతలు  ఈ విషయాన్ని చాలా చోట్ల ప్రతిధ్వనించారు. (తిమోతి 3:16-17) జీసస్ ప్రేమను గురించి దాతృత్వాన్ని గురించి కొన్ని ఉన్నతమైన విషయాలు ప్రవచించాడు. అవి నైతికంగా గొప్ప అంశాలు. జీసస్ కు ముందే అలాంటి అంశాలు జొరాస్టర్, బుద్ధ, కన్ఫ్యూషియస్, ఎపిక్టిటస్ వంటి వారు చెప్పారు. బైబుల్ కంటే ఇంకా నిర్దిష్టంగా స్వీయ ప్రాధాన్యతను అధిగమించి ఎలా సాగిపోవాలో అనేక గ్రంథాలు ఉదహరించాయి. పాత కొత్త బైబుల్ నిబంధనలలో అసహ్యకరంగా హింసను మెచ్చుకుంటున్న సందర్భాలు అనేకం కనిపిస్తాయి. క్రైస్తవం గనక ప్రేమకు దయకు ప్రాతినిధ్యంగా నిలిచిందంటే ప్రపంచంలో ఇతర మతాల గురించి తెలుసుకోలేదన్నమాట.
జైనమతాన్ని గురించి చూడండి. జైనులు కేవల అహింసావాదాన్ని బోధించారు. విశ్వాన్ని గురించి వారు చెప్పిన విషయాలలో సంభవం కానివి చాలా ఉన్నా మత చిత్రహింసల పేరిట జరిగిన క్రూరత్వాన్ని వారు నమ్మలేదు. క్రైస్తవుల మత హింసాకాండ తప్పుత్రోవను పెట్టిన చర్యగా వీరు భావించవచ్చు. బైబుల్ బోధనలు పరస్పర విరుద్ధంగా గందరగోళంగా ఉన్నందున క్రైస్తవులు ఐదు శతాబ్దాలపాటు వారంటే నమ్మకం లేనివారిని సంతోషంగా తగలపెట్టారు. క్రైస్తవులు ఆరాధించి గౌరవించే సెయింట్ అగస్టిన్, థామస్ అక్వినాస్ లు విశ్వాస రహితులను చిత్రహింస చేయాలని (అగస్టిన్), చంపేయాలని (అక్వినాస్) చెప్పారు.
క్రైస్తవ మతానికి చెందని వారిని, నమ్మకం లేనివారిని, యూదులను, దయ్యం పట్టిన వారిని మూకుమ్మడిగా చంపేయాలని మార్టిన్ లూథర్,  జాన్ కాల్విన్ ప్రచారం చేశారు. బైబుల్ ను మరోవిధంగా మీరు వ్యాఖ్యానించవచ్చు. చరిత్రలో చాల ప్రభావవంతం చేసిన వారు క్రైస్తవ బోధనలని విడమరచి చెప్పినదానికంటే వీరు భిన్నంగా భాషించకపోవచ్చు. జూనియర్ మార్టిన్ లూథర్ కింగ్ వంటి వ్యక్తులు క్రైస్తవులలో ఉత్తమ ఉదాహరణ అని చాలామంది క్రైస్తవుల నమ్మకం. ఇందులో పెద్ద సమస్య ఇమిడి ఉన్నది. మార్టిన్ లూథర్ కింగ్ జూలియర్ కు ఆదర్శంగా నిలిచింది క్రైస్తవమే అయితే జైనిజం అనేది గుర్తించాలి. మార్టిన్ లూథర్ కింగ్ జూలియర్ తాను మహాత్మాగాంధీ నుండి అహింసా విధానాన్ని స్వీకరించినట్లు చెప్పాడు. 1959లో భారతదేశం పర్యటించి గాంధీ శిష్యుల నుండి అహింసాయుత పోరాటానికి అనుసరించాల్సిన సూత్రాలను నేర్చుకున్నాడు. హిందూగా ఉన్న గాంధీకి అహింసా సిద్ధాంతం ఎక్కడ నుండి వచ్చింది? జైనుల నుండి వచ్చింది.
జీసస్ గనుక పొరుగువాడిని ప్రేమించు అంటూ దివ్య సూత్రాన్ని చెప్పాడని నీవనుకుంటే బైబుల్ కొత్త నిబంధన మళ్ళీ చదువు. జీసస్ మళ్ళీ తిరిగి వస్తే నీతి ఎలా ఉంటుందో ఒకసారి గమనించు?
ఏలన, దేవుడు ఏది న్యాయమో దానినే చేయును. మిమ్ము కనిపెట్టువారికి కష్టములు కలిగించును. శ్రమనొందుచున్న మీకు మాతో కూడా విశ్రాంతి కలిగించును. శక్తిమంతులగు దేవదూతలతో యేసు ప్రభువు దివి నుండి ప్రత్యక్షమైనప్పుడు ఆయన ఇట్లు చేయును. దేవుని ఎరుగని వారిని శిక్షించుటకును, మన యేసు ప్రభువును గూర్చిన సువార్తకు విధేయులు కానివారిని దండించుటకును, అగ్ని జ్వాలలతో ఆయన దివి నుండి దిగివచ్చును. దేవుని సన్నిధికిని, ఆయన మహత్తర మహిమకును దూరస్థులై శాశ్వత వినాశమనెడి దండనమునకు వారు గురియగుదురు.’
--  2 తెసలోనియన్స్ 1:6-9
‘నాయందు నివసింపనివాడు తీగవలె పారవేయబడి ఎండిపోవును. అట్టి తీగలను ప్రోగుచేసి నిప్పులో వేసి తగులబెట్టుదురు.’
-- జాన్ 15:6
ఒక రకంగా చూస్తే జూనియర్ మార్టిన్ లూథర్ కింగ్, అసిసీకి చెందిన సెంట్ ఫ్రాన్సిస్ చర్యలవంటివి జీసస్ లో కనిపిస్తాయి. మరో తీరులో జీసస్, మత చిత్రహింసల ప్రతి రూపంగా నిలిచాడు. బైబుల్ నీతి విషయంలో మార్గదర్శిగా నిలిచిందని నమ్మేవారు వింత భావాలతో ఉన్నారేమో అనిపిస్తుంది. బైబుల్ లోని నైతిక వివేచనను అంచనా వేసేముందు అందరికీ తృప్తికరంగా ఉండే రీతిలో నైతిక అంశాలను పరిశీలించడం మంచిది. బానిసత్వాన్ని గురించిన అంశం చూద్దాం. బానిసత్వం చాలా హీనమైనదని నాగరిక ప్రపంచమంతా నేడు అంటున్నది. ఈ విషయంలో అబ్రహాం దేవుడి నుండి సంక్రమించిన నీతి సూచనలు ఏమిటి? బైబుల్ ని సంప్రదించండి. సృష్టికర్త బానిసలని అట్టేపెట్టుకోమని మనకు చెప్పాడు.
నీకు బానిసలు కావలసి వచ్చినచో చుట్టుపట్ల నున్న అన్యజాతుల నుండి కొని తెచ్చుకొమ్ము.
మీ చెంత నివసించు పరదేశుల బిడ్డలను గూడ మీరు బానిసలుగా కొనవచ్చును. మీ దేశమున పుట్టిన ఇతర జాతుల సంతానము కూడా మీ సొత్తు కావచ్చును.
అట్టివారిని మీరు గతించిన తరువాత మీ పిల్లలు కూడా శాశ్వతమైన సొత్తుగా వాడుకోవచ్చును. అట్టి జనము మీకు బానిసలు కావచ్చును. కాని మీ తోడి యిస్రాయేలీయులను మాత్రము మీరు కఠినముగా చూడరాదు.’
-- లెవీయ కాండం 25..44-46
బైబుల్ ప్రకారం ప్రతివాడూ తన కుమార్తెలను లైంగికంగా అమ్ముకోవచ్చు. అందులో కొన్ని నాజూకులు చూపారనుకోండి :
‘ఒకడు తన కొమార్తెను బానిసగా విక్రయించిన, ఆమె మగ బానిస మాదిరిగా స్వేచ్ఛను పొందజాలదు.
ఆమె తన్ను పొందిన యజమానుని సంతోషపెట్టలేకపోయిన అతడు ఆమెను తిరిగి విక్రయించవచ్చును.
కాని ఆమెను విదేశీయులకు అమ్ము అధికారము అతనికి లేదు. అట్లు చేయుట అన్యాయము.
యజమానుడు ఆమెను తన కొమారుని కొరకు ఉద్దేశించినచో తన కొమార్తెపట్ల ఎట్లో అట్లే ఆమెపట్లను వ్యవహరించవలయును. ఎవ్వడైనను మారు పెండ్లమును చేసుకొనినచో మొదట ఆమె కూటికి, గుడ్డకు, దాంపత్య ధర్మమునకు లోటు లేకుండా చేయవలయును.
ఈ మూడింట అతడామెను మోసగించిన, ఆమె ఎట్టి సొమ్మును చెల్లింపకయే స్వేచ్ఛగా అతనిని వీడిపోవచ్చును’
--- నిర్గమ కాండం 21..7-11
బైబుల్ లో బానిసత్వాన్ని గురించి దేవుడు చెబుతూ వారి కళ్లను లేదా పళ్ళని హానిపరిచే ధోరణిలో కొట్టవద్దని మాత్రమే చెప్పాడు. (నిర్గమ కాండం 21) అమెరికాలో బానిసత్వాన్ని అంతం చేయడానికి అలాంటి నైతిక ధోరణి అవలంబించలేదు.
నూతన నిబంధనలలో జీసస్ బానిసత్వాన్ని అభ్యంతర పెట్టినట్లు ఎక్కడా చెప్పలేదు. సెయింట్ పాల్ చెబుతూ బానిసలు తమ యజమానులను బాగా సేవించాలని ముఖ్యంగా క్రైస్తవ యజమానులను బాగా చూసుకోవాలని అన్నాడు..
భూమిపై మీ యజమానులకు ఒడంబడి భయభక్తులతో, పిలుస్తూ ఆరాధించేటట్లు, సేవ చేసుకోవాలి.’
-- ఎఫీషియన్స్ 6..5
ఎవరు కాని దేవుని నామమును గూర్చియు, మత బోధనను గూర్చియు దూషింపకుండునట్లు బానిసలు తమ యజమానులపట్ల సకల గౌరవములను చూపవలెను.
యజమానులు విశ్వాసులైనచో, వారు తమ సోదరులేనని, బానిసలు వారిని నిర్లక్ష్యము చేయరాదు. అంతేకాక తమ సేవ మూలముగా లాభమును పొందువారు విశ్వాసులును, తమ ప్రియ సోదరులును కనుక వారిని మరింత అధికముగ సేవింపవలెను.

మూలం అనువాదం
శామ్ హారిస్ ఎన్. ఇన్నయ్య